Vivimos ente la decadencia porque ye una parte del ciclu vital. Too decai en dalgún momentu. Tamién les sociedaes, que son, a la fin, constructos humanos. Lluchamos a la escontra de la decadencia porque ta na nuestra naturaleza, pero puestos énte ella comprendémosla y tolerámosla. El sentimientu de perda y de señaldá que xenera la contemplación de lo decadente ye bien de vegaes una fonte d’inspiración llírica y estética pa la creación artística.

Pero sentimos que la decadencia d’Asturies ye d’otra miente. Ye una decadencia estructural, ye estática porque percibimos qu’equí nun esiste un ciclu que nos acerque a los bonos tiempos. Tamos allancaos nuna inercia que nos impide salir de la situación con medios propios, perdiendo’l fuelgu y la identidá en decisiones equivocaes.

En LaKadarma nun presumimos de conocer toles causes d’esta decadencia y muncho menos de poder apurrir les soluciones, anque deprendimos qu’analizar los problemes, denuncialos y pasar a l’aición p’arreblagar penriba d’ellos son les siendes pa volver al camín.

Les semeyes qu’equí apaecen son un mostrariu simbólicu de munches de les cares d’esta decadencia, que percuerre esti país d’occidente a oriente y de norte a sur. Esperamos que la contemplación d’esti calendariu, que va a ser acompañamientu y testigu del ciclu vital nesti 2020, faiga que salgamos d’esi bañu de relax fuera de llugar, pa danos cuenta del tiempu que llevábemos somorguiaos nel agua puerco de la bañera les vaques.

So'l títulu LaKadarma Transdicional, LaKadarma propón un exerciciu de reflexón so'l papel diferenciáu que la sociedá patriarcal atribúi a muyeres y homes nel ámbitu tradicional asturianu. Inspiráu n'escenes rurales del sieglu pasáu, el calendariu recueye un total de doce semeyes feches pola fotógrafa Leti Cernuda nes que se subvierten los roles tradicionales de xéneru. D'esta manera, rescamplen ñidiamente los diferentes espacios, actividaes d'ociu o llabores cotidianos reservaos pa homes y muyeres; una división espacial y funcional que sirvió pa xustificar les diverses relaciones de poder que relegaben a les muyeres a un segundu planu.

Yá ta equí ElKalendariu 2016, una de les cites más esperaes nel añu kadármicu. Nesta ocasión va ser a doble cara y la temática del mesmu son dalgunes de les series de televisión mítiques de les nuestres vides. 

En pocos díes los tendremos disponibles. Esti añu, col fin de sufragar dalgunos gastos loxísticos pa la ellaboración del mesmu, ponemos-y un donativu simbólicu de 2€ a cada calendariu.

Yá sabes, ponte en contautu con nosotros pa nun quedate ensin él!

Esperamos que te preste tanto como a nosotros!