Entamamos esti camín con Flavio Benito. Facémoslo, de mano, porque nos da la gana. Porque la so cercanía y confianza amenorguen la nuestra vergoña poles fondes carencies nel estilu periodísticu. Y polo que representa na nuestra manera d’entender la música asturiana siendo, como foi, el maestru de munchos de nosotros. Pero también polo que representa pa la cultura asturiana tres de munchos años de trabayu multidisciplinar nel país y fuera d’él, collechando una reconocencia bultable.

 

Valió de soliloquiu. Vamos dar LaParPayuela…

-Nesti tiempu tas dedicáu a la docencia nel Conservatoriu Profesional de Música de Xixón,que vamos dicir que ye'l tol llabor visible. ¿En qué otres estayes tas trabayando?

¡Meca, nun t'abulta bastante! Les clases en Conservatoriu llévenme munchu tiempu. Nun sólo son les clases, ye la preparación de les mesmes, l'arreglu de repertoriu pa tocar con otros instrumentos... la verdá ye que tengo xera abondo. De toes formes, tamién toi rematando la segunda parte de “Alborada”, el mio últimu llibru de gaita espublizáu por Trabe, con una propuesta secuenciada de repertoriu pa los seis cursos que formen les Enseñances Profesionales de gaita nos Conservatorios de Música.

-Pervese na to obra que busques romper el binomiu clásicu gaita-tradición, al traviés de creaciones ya iniciatives averaes a otros estilos musicales. ¿Ónde cuentes que la gaita pue atopar rexistros cómodos y afayadizos a curtiu o mediu plazu

Creo que ye mui importante pal mundu de la gaita abrir nueves víes d'espresión pal instrumentu. Pa mi concretamente ye esencial, y non puedo remediar facer un usu creativu del mesmu. Pa un músicu, entendiendo como músicu una persona creativa y sensible pa coles diferentes artes y formes d'espresión, debiera ser insoportable llimitase a tocar lo que tocaron otros va 80 o 100 años. Nun se pue facer la música que se facía va 80 o 100 años y quedase tan panchu: esa música respondía a una época concreta y furrulaba plenamente nesa época. Agora a min paezme que debemos tar n'otres histories y ye un fechu coles bandes de gaites y'l Folk, por exemplu.

-¿Cómo analices la situación de la música asturiana –non sólo la de gaita- énte la crisis económica d'anguaño?

La crisis, home... y la música asturiana, ay, ay, ay! Crisis haila dende hai bien de tiempu en Cuba, por exemplu, y la so música nun para de funcionar per tol mundu en estremaos formatos. Dende Pablo Milanés y Silvio Rodríguez a Bebo Valdés y El Cigala, de Ry Cooder y el so Buenavista Social Club a Orishas o Los aldeanos. Por nun falar de orquestes como los Ban ban, entre más otros. Y si falamos de Brasil… ¡¡ay non, qu'agora ye una potencia emerxente y lo de les faveles y eses coses ya pasó!! pero Caetano Veloso, María Betania, Hermeto Pascual, Carlinhos Brown y Tribalistas, etc.
Tenemos que tener presente que la gaita n'Asturies ye un instrumentu venceyáu a la tradición y forma parte de la nuesa identidá, pero esa tradición foi fraguando pasín ente pasu y nun tuvo quieta na vida. La tradición faise tolos díes y yo soi de los que piensen que la única forma de da-y un futuru a la gaita ente nosotros, ye faciendola sentir necesaria; ye faciendola imprescindible na sociedá que nos toca vivir; facela vibrar y que los asturianos seyan quien a disfrutar con ella. Ye mui complexo nel tiempu de facebook y los wasapp, pero hai muncha xente que ta nello dende hai tiempu.
El problema ye muncho más fondu que la crisis económica actual, que quiera Dios qu'en cinco años nun nos alcordemos d'ella. Creo que ye un problema d'entender que la música que faes tien que conectar col públicu. Y hai munchos públicos qu'atender. Nun nos podemos quedar nel públicu siguidor de la tonada.

-De toes formes ye fácil reconocer un progresu bultable na calidá de la música asturiana y, en concreto, de la gaita nos últimos años. ¿Cuálos camientes que son los pegollos que sofitaron esti progresu? ¿La profesionalización de los estudios de gaita fáese notar yá o habrá qu'esperar unos años?

Dende llueu que s'aprecia l'ameyoramientu: na manufactura de los instrumentos, na interpretación de los solistes, nes grabaciones de les bandes de gaites, el folk o el rock, pero ¿en qué se concreta eso? ¿en qué espacios se fai bultable? ¿nun concursu onde hai 50 persones viéndolu, que son amás los familiares que tan acompañando al so fiu o a la so ñeta? Esi ye'l tema que m'esmolez. A los que tamos metíos nesti mundín paeznos que tol mundu ta al tanto de lo que nos asocede, pero fai una prueba pa comprobar de lo que te falo: entrúga-y a un neñu de 12 años que tea tocando la gaita nuna Escuela de Música quién ye Hevia... vas date cuenta de lo despistaos qu'andamos.
La presencia de la gaita nos Conservatorios ye de mui recién entovía (tamos nel séptimu cursu), pero tan faciendose coses de munchu interés. Dende llueu, col tiempu dirán viéndose los resultaos.

-¿Sigue habiendo sitiu pal gaiteru non profesional nel mundu de la música asturiana?

Pamidea, ensin dulda. El tema ye alcontrar una formación onde tea cómodu (lo mesmo da una pareya de gaita y tambor, una bandina, una banda de gaites o lo que seya) y que pueda facer una propuesta interesante.

-¿Y qué papel consideres que desendolcaron y desendolquen les escueles de música pal espoxigue y espardimientu de la música de gaita?

Creo que foi determinante. Pamidea fueron les qu'allegaron la gaita a les families d'una manera natural. Paezme que na mayoría de los casos ficieron un trabayu bien curiosu.

-Fuisti direutor de perconocíes bandes de gaites dende hai bien d'años. ¿Qué representó esi fechu pa ti? ¿Veste nel futuru dirixendo otra vegada una banda de gaites?

Foi too mui natural. Embobáu cola música na mio formación, coincidióme siendo poco más qu'un rapacín cuando entamé a dirixir la banda de gaites “Xaranzana”. Poco dempués, y a la par, fui dirixendo “Xana” de Perlora o más tarde “La Raitana”. Esta xera ayudóme en munchos aspectos, ente ellos a madurar personalmente, a faceme entender y a enseñame a entender a xente mui heteroxéneo.
Y atendiendo a lo de dirixir... por qué non. Agora mesmo non, pero cuando medre un poco la mio neña pequeña y tenga un poco más de tiempu, quién sabe. A mi préstame pola vida tar ente gaites y con xente que comparte esos gustos.

-¿Cuál ye'l to ideal de banda de gaites? ¿Qué te paez que tien qu'ufiertar una agrupación d'esti calter?

Bufff, ufiertar… por entamar polo último. Contamos con un instrumentu que requier de bastante tiempu pa facelu sonar “semidecentemente” pero lo más aquello ye que lo que faigas cola agrupación seya entretenío, que la xente que se pare a mirate nun pueda marchar hasta qu'acabes. Y sobremanera que la xente que tea tocando disfrute de lo que fai.

-¿Paécente les condiciones de güei afayadices p’algamar un escenariu de reconocimientu pa les bandes de gaites asemeyáu al d’otres naciones celtes? ¿Cuáles son eses condiciones necesaries?

Ye bien abegoso, pero les condiciones tenemos que procurales, nel significáu portugués del terminu: “buscales” nosotros. Somos los profesionales del sector los que tenemos que xenerar les condiciones pa que la sociedá repare nel fenómenu. En Bretaña consiguiéronlo, y hai qu’alcordase d’aú taben a mediaos de los ochenta y no qu’anden agora les bagadou. Asina que ¿pourquoi pas?

-Gustaríanos, pa conocer meyor la personalidá de Flavio Benito, que nos recomendares un discu, un llibru y un llugar pa visitar…

Home, home, conocer la mio personalidá… bono, vamos a lo que vamos.
Un discu. Madre, ¿un namás? Pues p'allá voi: Brian boru, d’Alan Stivell.
Un llibru. Falando de lo que tuvimos falando vien mui a cuentu. Toi acabante de lleer "Tocar un instrumento" de José Antonio Coso, espublizáu pola editorial Música Mundana y nun paro de recomendalu.
Un llugar pa visitar. Un sitiu que me presta muncho pola vinculación familiar (ellí nació y vive la mio güela paterna) nun ta mui lloñe pa cualesquiera que resida n'Asturies. Ye la costa noroccidental asturiana. Hai sitios preciosos nel conceyu de Castripol: la propia capital tien una maxa especial o pueblos como As Figueiras también na Ría del Eo trespórtente a otru tiempu.

-Yá p'acabar, qué entruga quies que te conteste'l nuestru próximu entrevistáu (ensin saber quién va ser)

¿Pa qué sirve una banda de gaites n’Asturies?