La ParPayuela

Na xera d’iguar el mundu dende’l chigre tenemos un máster los asturianos. El nuestru, en particular, ye cum laude. Nun sé si porque supimos garrar la esencia del ser asturianu como nengún otru, o porque pasamos más hores nel chigre de lo qu’encamienta la OMS.

Pero pa poco val esti mou de proceder si de verdá queremos otra realidá. Y nós queremos ser meyores. Queremos ser LOS MEYORES.

¿Qué ye lo que siente’l públicu cuando suena un Stradivarius na mano experta de Matteo Fedeli? ¿O cuando l’Otelo de Plácido Domingo xenera en Viena un aplausu ensin descansu d’ochenta minutos? ¿O cuando Jimmy Hendrix, acabante dar un conciertu memorable nel Monterey Pop Festival esgoncia y prende fueu a la so Fender Stratocaster? ¿O cuando Metallica aconceya nel Monsters of Rock de Moscú del añu 1991 a 2 millones de persones que saben cantar a una voz “Enter Sandman”? ¿O cuando la estrella Michael Jackson “caminaba pela lluna” ufriendo canciones sacaes d’un discu “Thriller” que, pola mor de los 110 millones de copies vendíes, nun pue calificase más que como “d’otra galaxa”?

Pues d’eso tamos falando. Non de númberu de xente, nin d’escenarios míticos. Tampoco de contratos millonarios nin, claro, de virtuosismu interpretativu. Tenemos los pies na tierra.

Falamos de sensaciones, d’espertar nel públicu esi interés, esa euforia del que sabe que ta viviendo daqué importante; la conmoción del que sabe que tando nesa actuación va acabar siendo parte de la hestoria. Y falamos también de que dempués de conocenos, daquién diga: “Prestaríame tocar con ellos”.

Pensamos que nun hai otra forma d’algamalo que deprender de los meyores, de los que ficieron posible que la música asturiana llegara a esti puntu. De los que con bon arte collecharon l’éxitu. De los que llevaron la música d’esti país a onde naide pensaba que podía llegar al traviés de trabayu seriu, munches vegaes silenciosu y demasiaes vegaes desagradecíu. Tamién de los que s’enquivocaron pero, reflexonando, salieron reforzaos.

Y pa esto nun valen aquellos alderiques encesos del chigre. Delles veces tampoco valen les entrevistes feches por otros. Pa nós, ye perimportante alcontranos con esa xente y poder facé-yos les nuestres entrugues.

LES NUESTRES, pero qu’esperamos que seyan les de munchos más.