Igual nun fai falta dicívoslo, pero siempre mos valimos d’ElKalendariu pa contaxar el nuestru mou de sentir la cultura d’Asturies y el nuestru enclín por aniciar un cambéu social nesti país; el calendariu DeKadencia2020 espeya bien esi pruyimientu.
Sicasí, esti 2021 nun mos paecía’l meyor añu pa querer contaxar nada. O pelo menos de contaxavos de más murnia. Emprimamos entós a trabayar nuna idea que cumpliera col ideal pa esti añu: L’OPTIMISMU REIVINDICATIVU.
Punximos unos cuantos cm3 de tiesta a furrular y, ente otros temes interesantes qu’igual queden pa otros años, gustónos el que yá podéis güeyar y apalpar. Reivindicamos, claro, l’arte pictóricu asturianu, poco conocíu y nunca abondo emponderáu.
Tábemos nel mes d’agostu y yá teníemos la temática decidida; llegamos a pensar que nos tábemos europeizando, pero non. Yera namás l’aniciu, qu’había que completar cola escoyeta de los artistes sabiendo que díbemos dexar munchos pel camín, pero había qu’establecer unos criterios:
- El formatu diba paecese al d’otros años, d’una llámina cada mes onde los componentes de la banda apaecen retrataos escenificando’l cuadru escoyíu. Eso faen 13 semeyes (los doce meses y la portada). Asina que ¡hola, Leti Cernuda!, ¿qué tienes que facer los próximos meses? Ye pa unos collacios…
- Les obres pictóriques escoyíes habíen ser figuratives pa poder representales nós. Ye verdá que nesta banda hai cuerpos astractos (y les mentes yá nun digamos), pero creo que vos decatáis de lo que queremos dicir: los artistes d’obra astracto nun diben poder salir esta vegada.
- Estudiamos vides y obres (estudiamos y somos rigorosos, magar que los direutos d’Instagram suxeran lo contrario) pa tener una idea global del desendolcu de los caberos dos sieglos de pintura. Darréu d’ello, tomamos dos decisiones:
1. Queríemos desaniciar la infrarrepresentación de les muyeres nel arte pictóricu. Trabayu mos costó alcontrar semeyes de les pintores clásiques, pero a la fin pudimos dar con elles pa dexar una proporción xusta y equilibrada.
2. Buscamos facer repás tanto d’obres clásiques como d’obres actuales, amosando la bayura d’estilos cola que cuntamos.
- OXETIVU: AFUXIR DEL ANDANCIU. Los cuadros nos que mos basamos habíen representar a personaxes solitarios o en grupos pequeños. En casu de grupos más grandes, había facese la semeya nel esterior y calteniendo distancies de seguranza. Les sesiones fotográfiques tuvieron qu’adautase a los zarros perimetrales y les selmanes de confinamientos parciales. Y toes eses coses que sentistis unes poques vegaes en tol 2020. Lo del títulu “LaMazkarada”, que sabemos que sois llistucos, tien esi sen doble ente l’antroxu d’Evaristo Valle na portada y la Dómina de les Fociqueres na que vivimos.
Bono, y arriendes de too ello, quedábamos el trabayu (y non pequeñu) d’iguar el diseñu xeneral, amestar les efemérides y festividaes, inxertar los preseos básicos de los calendarios (ciclos llunares, cambeos d’estación, horariu, etc) ¡¡¡y retocar les semeyes!!! (pa esta ocasión, amás, quiximos consiguir un “efeutu pintura” que fizo’l llabor más duru). Como quedamos mal a gustu nun pudiendo asoleyar a toles artistes que nos presten, el fondu de les llámines incorpora (mui clarines y dilíes, eso sí) miniatures d’otres munches obres d’asturianos y asturianes d’ayeri y güei. “Ayeri y güei” que suena mui épico si suena de fondu Nuberu…
En resume, que tenéis yá ElKalendariu 2021 a disposición, productu del trabayu y el procuru d’estos meses. Esperamos que vos preste enforma, y que vos pinte bien l’añu (espaciu d’humor Babel).
Munches gracies por sofitar el nuestru proyeutu.
Abrazos col-col-col-coldu.
Escribir comentario