Creyemos que yá se pue dicir: la errata d’ElKalendariu pasa de ser una costume a ser una tradición.
A lo primero foi un erru ensin importancia. Namás qu’escaecimos poner l’añu naquel primer calendariu fundacional. Sabemos que yera 2013, pero como delincuentes que quiximos ser, tamién robamos esa información.
Nun podemos asegurar cuántes errates pudieron venir dempués (esperamos que poques), pero nós detectamos dos, n’ElKalendariu de 2014 y de 2016, y les dos son idéntiques. El trasgu fizo que tracamundiáremos el 19 pol 20 de mayu, poniéndolos al revés ¡¡lo mesmo los dos años!! ¿Casualidá?
La sorpresa d’esti añu vien al estrenar mayu. Na primer selmana, apaez la referencia d’el mes d’abril con 31 díes. Sicasí, la llámina propia d’abril ta correuta (con 30 díes) y la del mes propiu de mayu tamién, colo qu’esperamos que nun s’afecte la validez d’ElKalendariu y quede namás como otra anéudota. Perdonái por día extra de confinamientu…
Pero a la fin, ElKalendariu nun diz mentira y güei ye’l Primeru de Mayu, Fiesta del Trabayu. D’un trabayu, eso sí, con poco que celebrar y que llama al pesimismu. Pero tenemos qu’alcordanos que’l Primeru de Mayu ye, sobre too, el Día de les y los Trabayadores, de la nuestra xente.
Dende LaKadarma mandámosvos los nuestros meyores deseos de xunión, solidaridá, conciencia y fuercia. Y música. Muncha música.
Escribir comentario