Por Andrea y Rodri Joglar
Mui bones a toes y a toos. Depués d’un breve parón na publicación d’entraes nesti blogue, vamos retomalo pa dir comentándovos poco a poco les novedaes de l’agrupación.
Güei vamos falavos de la que probablemente seya l’actuación de mayor importancia que fadremos esti añu: el Concursu de Bandes de Gaites Asturianes de Xixón.
L’eventu, entamáu pol Conceyu de Xixón dientro de la programación del Festival Arcu Atlánticu, celébrase esti sábadu 27 de xunetu nel recintu del Muséu del Pueblu d’Asturies. L’apertura de puertes sedrá a les 10.30 hores y’l concursu entamará a les 11:00.
La competición supón el final d’un periodu de cuasi 10 años ensin nengún tipu de concursu específicu pa Bandes de Gaites n’Asturies, lo que mos convertía nel únicu territoriu nel que, habiendo una implantación afitada d’esti tipu d’agrupaciones musicales, nun esistía nenguna fecha d’estes carauterístiques.
Dende LaKadarma consideramos que los concursos son una oportunidá de meyora bultable pa les bandes, empobinando los ensayos y arreglos musicales hacia un fin claru nel que ye necesariu’l trabayu y esfuerciu de tolos componentes pa tratar de facelo lo meyor posible. Si too esi trabayu y esfuerciu sirve pa disfrutar y facevos partícipes de la nuesa propuesta musical, muncho meyor.
Amás, pa nós supón una esperiencia mui ilusionante, porque, salvo contaes esceiciones, esta sedrá la primer vegada na que muchos de los nuesos componentes participarán nun concursu de bandes de gaites.
En cuantes al amiestu col que vamos participar, ta formáu por un garrapiellu de melodíes tradicionales y de nueva composición escoyíes polos componentes ya iguaes especialmente pa la ocasión. Estes pieces son:
Marcha pa Santu Adrianu (Xuan Nel Expósito)/Teus lindos olhos (Mafalda Arnauth)/Fusco (Anxo Pintos)/Muñeira de Degaña (Trad. Asturiana)/ Let the cold wind blow (Kate Rusby)/Saltón d’Urbiés (Trad. Asturiana)/D’allá (Flavio Benito)/Codas Interruptus (Rodrigo Joglar).
Tará echándonos un gabitu a les percusiones Sara Fernández, percusionista del grupu Verdasca y collaboradora habitual de la banda nesta estaya.
Esti día sedrá doblemente especial pa nós, ya que supondrá l’estrenu mundial de la nueva indumentaria de la banda: traxes tradicionales asturianos ellaboraos pola modista piloñesa Aurora Crespo, qu’amás ye la ma de Duardo, gaiteru de la banda. Queremos tamién agradecer fonderamente l’ayuda inestimable de Laura Ruíz qu’ayudónos a conseguir les teles, non ensin pocos quebraderos de cabeza, y fízose cargu de les monteres y faxes, asina como a Guadalupe Villanueva que fízonos les lligues. Con esta nueva indumentaria ponemos fin a una etapa de cuasi un añu y mediu de non uniformidá, traxes emprestaos y equilibrismos varios pa poder cumplir coles nuestres actuaciones.
Podéis sentir un cachín del nuestru set 2013 na nuestra cuenta de Soundcloud, pinchando nel reproductor del llau izquierdu de la páxina.
Tamién fadremos un ensayu abiertu al públicu mañana, miércoles 24 de xunetu, na plaza Dominganes de Nava a partir de les 19:30 hores. Pa tolos que vos animéis a facenos una visita, podréis sofitar l’agrupación mercando una camiseta o facevos cola nuestra llotería de navidá, nun vaya ser que toque y depués tengamos un disgustu…
¡Vos esperamos a toos!
Escribir comentario
Cedric (miércoles, 24 julio 2013 09:10)
Muchisima suerte en el concursu, Un abrazu!!!!!!
Mui Yarber (jueves, 02 febrero 2017 05:52)
Wow, fantastic blog layout! How long have you been blogging for? you made blogging look easy. The overall look of your site is great, as well as the content!
Odelia Wygant (martes, 07 febrero 2017)
Nice post. I was checking constantly this blog and I'm impressed! Very useful information specifically the last part :) I care for such info much. I was seeking this particular info for a very long time. Thank you and best of luck.