Por Rodri Joglar
Dende l'aniciu de l'andadura de la agrupación, en LaKadarma tuvo nidio qu'ún de los caleyos que díbemos percorrer yera'l de la investigación y l'afondamientu de les posibilidaes musicales de la gaita asturiana, y les implicaciones qu'ello pueda tener nuna agrupación como una banda de gaites.
La gaita ye un instrumentu con una tesitura llimitada, cuya amplitud tradicional va dende una nota Si 3 (la sensible del punteru, siempre falando de una gaita afinada en Do) hasta un Fa 5. Anguaño algamase una escala cromática, llográndose les alteraciones con diferentes dixitaciones o tapando “medios furacos”.
Sicasí, dalgunos gaiteros solistes, casu de Marco Antonio Guardado, bon collaciu y profesor de gaita dellos años nel Conservatoriu Profesional de Música d'Uviéu, consiguen una tesitura de dos octaves completes y hasta'l Mib con estremaes posiciones alternatives y siempre con una preparación mui específica no qu'al empayuelao se refier. En tou casu, estos recursos requieren d'un altu grau de depuración técnica col instrumentu y nun son lo más afayadizo pa trabayar en banda de gaites. Poro, otra opción perinteresante pa ampliar la gama sonora d'estes agrupaciones ye l'emplegu de punteros afinaos en diferentes afinaciones.
Si miramos a la vecina Galicia, podemos atopar casos de varies bandes de gaites que nos últimos quince años apostaron por combinar punteros afinaos en diferentes tonos nes sos formaciones. Bandes como Zuncurrundullo (Lugo) emplegaron dende va bien d'años punteros afinaos en Sib 4 como tonalidá base de la banda, combinándolos con punteros en Fa 5 y 4, a distancia de dominante. Esta combinación tamién foi utilizada pola Real Banda de Gaitas da Diputación de Ourense. Pola so parte, Xarabal, una de les bandes históriques na música gallega, contó con punteros en Si 4, Fa# 4 y Mi 5, amás de combinaciones en momentos puntuales de gaites en Re 5 y Sol 4, toes elles del taller d'Antón Corral. Otres bandes como la yá desapaecía Ancoradoiro (A Coruña), dirixida por Pepe Romero, tamién trabayaron na investigación de la aplicación de gaites en diferentes tonos dientro d'una mesma agrupación.
Fuera de la Península, nos bagadoù bretones, ye habitual atopar dientro de la seición de bombardes combinaciones d'instrumentos en Sib 4 coles llamaes lombardes, afinaes en Mib 4o'n Sib 3, que dan gran bayura armónica a la agrupación.
Sicasí n'Asturies, por diferentes razones, durante munchos años la gama de tonalidaes comercializaes polos diferentes artesanos mantúvose entre el Sib 4 y el Re 5, emplegaes entre otres estayes pal acompañamientu de la canción asturiana, anque más recientemente se llograron les tonalidaes de Mib 5, La 4 y Sol 4, toes elles con una demanda más bien escasa por parte de los gaiteros y'l consiguiente menor grau de perfeccionamientu técnicu por parte de los luthieres na so construcción.
Por esa razón, entre otres, la mayoría de les bandes de gaites enfotáronse nel usu de gaites nuna mesma tonalidá, lo más común en Sib 4 o Do 5, anque anguaño tamién hai bandes, como La Laguna del Torollu (Uviéu) qu'emplega la tonalidá de Si 4.
Siguiendo cola continua evolución de la formación de banda de gaites n'Asturies, dende LaKadarma pruyimos pol emplegu de punteros afinaos en Sol xunta los de Do, como manera d'enanchar el rangu armónicu de l'agrupación, en concretu, ganando dos tonos y un semitonu per baxu de la sensible de Do 5, ye decir hasta un Fa#4.
Pa ello contamos col trabayu del luthier David López García, natural de Sopeña (Valle de Cabuérniga, Cantabria). David ye un perbón constructor de gaites gallegues, asturianes y whistle, asina como un investigador inagotable no qu'a nueves tonalidaes pal instrumentu se refier. Tien fechos punteros de gaita gallega de tonalidaes comprendíes entre'l Sib 3 y el Fa 5, lo qu'abarca una tesitura de más de tres octaves pa la tonalidá de Sib. No tocante a gaites asturianes, tien desarrollaos punteros nuna gama que va dende Mib 5 a Sol 4, y anguaño trabaya nun prototipu de punteru en Fa 5.
El pasáu mes de xineru de 2013, tres componentes de LaKadarma nos ficimos con punteros en Sol de David, construyíos en madera de bubinga. Dende estes llínies queremos amosa-y el nuestru agradecimientu y animalu a seguir trabayando nel perfeccionamientu d'esti tipu de punteros y na búsqueda de nuevos caminos na construcción de gaites.
Los punteros estrenáronse ente'l públicu dientro del amiestu “God save the 'K'”, col que participamos nel I Concursu de Bandes de Gaites “Arcu Atlánticu” de Xixón, en xunetu de 2013, siendo la primer vez qu'una banda de gaites asturiana combinaba punteros afinaos en Do 5 y Sol 4 nuna competición.
Escribir comentario