X Festival de Música Tradicional "Xácara"

El pasáu sábadu 10 de payares dellos componentes de LaKadarma pudimos asistir al X Festival de Música Tradicional “Xácara” qu'entama la banda de gaites uvieína que da nome al mesmu, fundada y dirixía pol maestru Ricardo Soberado.

Ricardo ye ún de los maestros gaiteros de la segunda xeneración de docentes de gaita d'Asturies, escolín de Xuacu Amieva. Tuvi la oportunidá de conocelu fará unos seis años, cuando foi profesor de gaita nel Conservatoriu Profesional de Música “Eduardo Martínez Torner” d'Uviéu. Pa quien nun lu conoza, trátase d'una persona apasionada polo que fai, y que porfia por ufrir a los sos alumnos lo meyor de sí dando clase de gaita.

La seición de percusión cuerre a cargu del emblemáticu tamboriteru asturianu Manuel Durán, gran espertu en tolo relacionao col mundu del tambor tradicional asturianu y principal introductor nes bandes de gaites asturianes de los instrumentos de percusión d'alta tensión y de la so téunica interpretativa.

Siendo esto asina, nun ye d'estrañar que Xácara seya, anguaño, una de les bandes de gaites punteres del panorama asturianu.

El conciertu allugóse na sala principal del Auditoriu d'Uviéu, un fechu que podría paecer ambiciosu a priori en cuantu a la gran capacidá del llocal. Ensin embargu, pudimos ver como, al igual que nel conciertu-grabación del discu “Llariegu 100% Directo” de la Banda de Gaites Llariegu nel teatru de la Universidá Llaboral, l'aforu de la sala taba casi al completu.

Pa esti X Festival, en cuenta de facer como otros años un conciertu a cargu de diferentes bandes de gaites y grupos de folk, Xácara ufrió un conciertu en solitariu, cola particularidá de xuntar nun mesmu escenariu a la práutica totalidá de maestros gaiteros de la “Quinta del biberón” de la gaita asturiana. Con esti nomatu, los gaiteros vieyos se referíen a esi grupu de mozos que nos años 80 entamaron a poner escuela de gaita per toa Asturies.

Personalmente, foi mui prestoso ver nun mesmu escenariu a dellos de los mios maestros como Pedro Pangua, Berto Varillas o Flavio Benito, que tantos años nos dirixera na Banda de Gaites “La Raitana”, amás d'otros, como Vicente Prado “El Pravianu”, Xuacu Amieva, Gustavo Eguren, Santi Caleya, José Manuel Tejedor o José Manuel Fernández Gutiérrez “Guti”. Xunto a ellos, tamién destaca la collaboración especial del perconocíu gaiteru escocés Fred Morrison, un habitual pelos escenarios folk asturianos.

Ca ún d'ellos participó nun tema del repertoriu de la banda, precedíu d'una narración de la so trayeutoria musical acompañada de delles semeyes.

El resultáu del conciertu foi perbonu anque l'axuntar a toos estos maestros nun mesmu escenariu tenía'l so puntu de dificultá a nivel organizativu.

El repertoriu foi variáu, espeyando una muestra de la música que vien trabayando la banda estos últimos años: melodíes tradicionales, composiciones, obres corales y dalgún tema foriatu, col únicu acompañamientu del tecláu de Ramón G. Morán y Gustavo Eguren, que tamién tocó'l curdión.

Pudimos ver, a nivel téunicu, una banda con mui bona afinación y empaste na seición de gaites, arreglos y armonizaciones cuidaes, asina como un bon emplegu de recursos ornamentales. La seición de percusión nun desmerez pa nada a la de gaites, siguiendo una llinia estilística de pipe band, característica de les agrupaciones dirixíes por Manuel Durán. Sicasí, como crítica constructiva, podríemos decir qu'echamos en falta un saludu de tambores nel conciertu, anque  de xuru que podremos sentilu n'otra ocasión futura y, tal vez, la inclusión de dalgún instrumentu de percusión diferente que diera más bayura al acompañamientu de la banda.

En resumen, un placer poder disfrutar de conciertos como esti. Namás nos queda felicitar a la xente de Xácara por estos diez años organizando'l so festival y que seyan munchos más regalándonos a toes y toos la so música. ¡¡¡Norabona!!!